MARY ROSE M. VERI

SI NANAY, SI TATAY

Si Nanay, si Tatay di ko babayaan,
Balakid na boot an sakuyang utang -
Sipagdara sako nin siyam na bulan,
Gatas na sinoso, di ko mabayadan.

Ay Nanay, ay Tatay, kon ako maghale,
Hihidawon nindo sa gabos na aki;
Maski makakua nin makakasangle,
Dai makaarog kan sakong ugale.

Ay Nanay, ay Tatay, kon ako maraot,
Pugotan nin payo, ibontog sa lawod,
Kon maheling nindo na naganodanod,
Ay Nanay, ay Tatay, sapoda man tolos.

Si Nanay, si Tatay daing pagkaherak,
Gustong agomon ko an sarong may kuyap.
Ay Nanay ay Tatay, kon kami mamogtak
Iloho ko siya tanganing matigbak.




SI MANANG PULANA

Si Manang Pulana nagsakat sa tuba,
Naloslos si saya, naheling si letra;
Kaso basahon ko c, o ko; c, a, ka;
Na kon bililogon sadiri ta ka na.

Si Manang Pulana nag banwit sa bobon,
Sinobadan pantat, kasiling binaton;
Kaso hapoton ko kon anong pinaon -
Alolonting ogis na may golonggolong.





SARUNG BANGGI

Sarung banggi sa higdaan
Nakadangog ako hinuni nin sarung gamgam;
Sa lubha ko katorogan
Bako kundi simong boses iyo palan..

Dagos ako bangon si sakuyang mata binuklat,
Kadtong kadikloman ako nangalagkalag,
Si sakong pagheling pasiring sa itaas,
Naheling ko simong lauog maliwanag.